መፅኃፍት ስለ አፄ ቴዎድሮስ

ታሪክ ሲባል እንግዲህ ውዝግቡ ብዙ ነው ፡፡ ታሪክ አይጠቅምም ከሚለው እስከ ታሪክ እንጀራቸው የሆነ ያክል ሙጭጭ ብለው እሰከያዙት ሁለት ጫፎች ድረስ፡፡ በመሃል ብዙ ውዝግቦች እንዳሉ ሆነው ማለት ነው፡፡ እንደኛ ባለ ታሪኩ (የተፃፈውም ያልተፃፋውም) ተወሳስቦ ባለበት ሀገር ደግሞ ጣጣው እና ትርጉሙ ብዙ ነው፡፡ የኢትዮጵያ ታሪክ  ሲባል ገና የየትኛዋ ኢትዮጵያ ታሪክ ; የ 100 ዓመቷ  ናት የ 3000 ዓመቷ ; ብለው ከሚጠይቁ አስከ የኢትዮጵያ ታሪክ ሙሉ ለሙሉ የጭቆና እና የመከራ ነበር አልፎም ኢትዮጵያ የብሄረሰቦች (የጎሳዎች) እስር ቤት እና የነጭ ጋቢ ለባሽ እና የዶሮ ወጥ ተመጋቢ  ቅኝ ገዥ እና የቡና ለቃሚ  እና የአደን አዳኝ ቅኝ ተገዥ ግንኙነት ነበር ከሚሉ የሲኦል ምስል ሰባኪዎች እስከ አይ ኢዮጵያማ ሀገረ-ሰላም፣ የኩሩ ህዝብና እና የድንቅ ባህል ሀገር እንዲሁም ለጠላቶቿ እሳት ለወዳጆቿ ገነት የነበረች ምድረ ገነት ነበረች እስከሚሉ የገነት ምስል ሰባኪዎች ድረስ፡፡

እኔ በበኩሌ ታሪክ ደስ ይለኛል ቢያንስ ለሀሴት(Pleasure ) እና ለእውቀት(Knowledge ) ሲባል በሚለው ሀሳብ ተመስርቸ፡፡ ማንም ሀገር ነጭ ወይም ጥቁር ታሪክ ነበረው/ አለው አልልም፡፡ ሁሉም ባለ ግራጫ  ታሪክ ነው ባይ ነኝ፡፡

ከኢዮጵያ ታሪክ ጋር አብረው ከሚነሱ ጥቂት ስብእናዎች ውስጥ አንዱ እና ዋነኛው አፄ ቴዎድሮስ ናቸው፡፡ ከላይ ስለ ኢትዮጵያ ታሪክ የሚነሳው ውዝግብ በአፄ ቴዎድሮስም ላይ መነሳቱ አልቀረም፡፡ እንደዚህ አይነት፡

<<አፄ ቴዎድሮስን ያገነናቸው ደርግ ነው፡፡ ደርግ ጃንሆይን ለማንኳሰስ ሲል የድሃ ልጅ ጀግና ሲፈልግ ቴዎድሮስን እና በላይ ዘለቀን አገኝ የጀግንነት ቅባም ቀባቸው እንጅ ቴዎድሮስማ ያው የኮሶ ሻጭ ልጅ ናቸው፡፡>>

<<አፄ ቴዎድሮስ ያለጊዜያቸው የተወለዱ፣ዘመናቸውን የቀደሙ፣ ንጉስ ሀሙራቢ የተበታተነችውን ባቢሎን አንድ አድርጎ ታላቅ ግዛተ-አፄ እንደመሰረተው አፄ ቴዎድሮስም የተበተነች እና ደካማ ኢትዮጵያን አንድ አድርገው  በዘመናዊነት ፈረስ ላይ ኢትዮጵያን የጫኑ እፀብ ድንቅ መሪ ናቸው፡፡>>

<<ቴዎድሮስ ተስፋፊ እና ኢ-ሰብዓዊ ድርጊት ሲፈፅሙና ሰያስፈፅሙ የነበሩ ከመሆናቸውም በተጫማሪ የዘመናዊት ኢትዮጵያ ችግሮች ጀማሪ እና ጠንሳሽ ነበሩ፡፡>>

<<ቴዎድሮስ የሃገርን ፍቅር ልክ እስከምን እንደሆነና ለሃገር የሚገባት ክፍያ ምን ድረስ እንደሚዘልቅ ያስተማሩ እና ምሳሌ የሆኑ ታላቅ ንጉስ እንዲሁም ሀይማኖትን ከመንግስት ለመለየት (የቤተክርስትያንን ጳጳስ እስከማሰር የደረሱ) ታላቅ ጥረት ያደረጉ አቢዮተኛ መሪ  ናቸው፡፡>> ወዘተ፡፡

የሆነው ሆነና አስኪ ስለ አፄ ቴዎድሮስ የተፃፉ ፅሁፎችን ሰፊው ህዝብ አንብቦ ይፍረድ በማለት ከዚህ በታች አምስት መፅኃፍትን አስቀምጠና፡፡ ያንብቡ፣ ይደሰቱም፡፡

 

የቴዎድሮስ ታሪክ

በደብተራ ዘነበ

ያጤ ቴዎድሮስ ታሪክ

ባልታወቀ ሰው

የዳግማዊ ቴዎድሮስ ንጉሰ ነገስት ታሪክ

በአለቃ ወልደ ማርያም

አጤ ቴዎድሮስ

በጳውሎስ ኞኞ

አፄ ቴዎድሮስ እና የኢትዮጵያ አንድነት

በተክለ ፃዲቅ መኩሪያ